Uda ikastaroen barruan, EHUk eta Euskal Herriko Bertsozale Elkarteak hitzaldi sorta antolatu zuten. Ikastaroaren izena "Denbora jakinean egin beharreko jendaurreko sormen lana: arrakastaren gakoak (I)"; eta, helburutzat, edozein komunikazio egoeraren aurrean, inprobisazioaz baliatzeko tresnak ematea. Horretarako, bertsogintzan erabiltzen diren baliabideak aztertu eta beste alorretan izan ditzaketen aplikazioak izan ziren hizpide. Joxerra Gartzia, Amaia Agirre eta Xabi Paya izan ziren ikastaroaren lehenengo zatiaren protagonistak Miramar Jauregian. Hurrengo egunean, berriz, ikastaroari amaiera eman zioten Kike Amonarrizek, Jon Martinek eta Andoni Egañak. Ondoren, ekitaldia bukatu osteko bertso-bazkarian, lau bertsolariak Joxerra Gartziaren eta ikastaroko zenbait partaideen esanetara jarri ziren. Hitzaldietan jorratutako hainbat gairen argitan egin zuten saio umoretsu eta esperimental hau.